1Ti 1 | NdeIBE | STEP | UPhawuli, umphostoli kaKhristu uJesu ngomlayo kaNkulunkulu uMsindisi wethu lokaKhristu uJesu ithemba lethu,

1 Timothy 1

1 UPhawuli, umphostoli kaKhristu uJesu ngomlayo kaNkulunkulu uMsindisi wethu lokaKhristu uJesu ithemba lethu,

2 KuThimothi indodana yami eqotho ekukholweni: Umusa, lesihawu kanye lokuthula okuvela kuNkulunkulu uBaba lakuKhristu uJesu iNkosi yethu kakube kuwe.

Isixwayiso ngabafundisi bomthetho abamanga

3 Njengoba ngakukhuthaza ekuyeni kwami eMakhedoniya, hlala khonapho e-Efesu ukuze ulaye abantu abathile ukuba bangafundisi imfundiso yamanga futhi 4 loba ukuchitha isikhathi ngezinganekwane langezinsendo ezingapheliyo. Lokhu kubanga ukuphikisana hatshi umsebenzi kaNkulunkulu – ongokukholwa. 5 Inhloso yalo umlayo luthando oluvela enhliziyweni emhlophe, lesazela esihle lokholo oluqotho. 6 Abanye sebedukile kulokhu baphendukela ekukhulumeni okuyize. 7 Bafuna ukuba ngabafundisi bomthetho, kodwa kabakwazi abakhuluma ngakho loba lokhu abakuqinisa kangaka ngesibindi.

8 Siyakwazi ukuthi umthetho ulungile uma umuntu ewusebenzisa kuhle. 9 Siyakwazi lokuthi umthetho kawenzelwanga abantu abalungileyo, kodwa wenzelwa abeqa imithetho labahlamuki, abangamaziyo uNkulunkulu labayizoni, abangengcwele labangakholwayo; wenzelwa ababulala oyise labonina, lababulali, 10 lezifebe, kanye lezixhwali, abathengisa izigqili labaqamba amanga kanye labafungela amanga – kanye lokunye okuphambene lemfundiso eqotho 11 evumelana levangeli elilenkazimulo kaNkulunkulu obusisekileyo, angiphathisa lona.

Umusa weNkosi kuPhawuli

12 Ngiyambonga uKhristu uJesu iNkosi yethu, onginike amandla, wangibona ngithembekile, wangibeka emsebenzini wakhe.

13 Lanxa ngake ngaba ngumhlambazi lomhlukuluzi lesidlwangudlwangu, ngenzelwa isihawu ngoba ngangenze ngokungazi langokungakholwa.

14 Umusa weNkosi wathululelwa phezu kwami ngokwanda okukhulu, ndawonye lokukholwa kanye lothando okukuKhristu uJesu.

15 Nansi isitsho esiqotho esifanele ukwamukelwa esithi: UKhristu uJesu weza emhlabeni ukuba asindise izoni – mina ngingesibi kakhulu sazo. 16 Kodwa ngenxa yasonalesi isizatho ngenzelwa isihawu, ukuze kuthi ngami, isoni esibi kakhulu, uKhristu abonakalise ukubekezela kwakhe okungelamkhawulo njengesibonelo kulabo abakholwa kuye bamukele lokuphila okungapheliyo. 17 Manje, kuyo iNkosi yaphakade, engafiyo, engabonakaliyo, uNkulunkulu yedwa, akube kuye udumo lenkazimulo kuze kube nini lanini. Ameni.

18 Thimothi, ndodana yami, ngikunika umlayo lo mayelana leziphrofetho ezake zenziwa ngawe, ukuze kuthi ngokuzilandela ungalwa ukulwa okuhle, 19 ubambelele ekukholweni lesazela esihle. Abanye bakwalile lokhu ngakho babhidliza ukukholwa kwabo.

20 Phakathi kwabo kuloHimenayo lo-Elekizanda, esengibanikele kuSathane ukuba bafundiswe ukungahlambazi uNkulunkulu.